{အသက်မွေးဝမ်းကျောင်း မဟုတ်ခဲ့ပေမယ့် ခံစားချက်တွေနဲ့ပြည့်နှက်နေတဲ့ အနုပညာမြစ်တစ်စင်းကတော့ ကျွန်တော့်နှလုံးသားအတွက် အဓိက ရေသောက်ဖြစ် တစ်ဆင်းပါပဲ}

Sunday 13 March 2011

အလုံပိတ် စာမျက်နှာလွတ်များ

Views

ကျွန်တော်သည် ဘာသာစကားမျိုးစုံသင်ဘူးသော စကားမပြောတတ်သူ တစ်ယောက်ဖြစ်ပါသည် ။ ထို့ကြောင့် ကျွန်တော်သည်
မလိုအပ်သော ဗျည်း များကိုလည်း ရှာဖွေဖူးပါတယ် ….ထို့ကြောင့် လိုအပ်သော ၀ါကျများကိုလည်း
ဖျက်ဖူးပါတယ်….။နိုင်ငံခြားရောက်နေသူများက ပြည်တွင်း အစားအစာများကို မှာစားကြပါတယ်
ပြည်တွင်းမှာနေသူတွေကလည်း နိုင်ငံခြား အစားများ မှာစားကြပါတယ် ထို့ကြောင့်ပဲ ကျွန်တော်လည်း
အနာဂတ် တစ်ပွဲ မှာစားဖို့ ကြိုးစားကြည့်ပါတယ်… ။ သိပ်တော့ အဆင်မပြေပါဘူး ကျွန်တော်တင်သွင်းလိုက်တဲ့
အနာဂတ်များမှာ မျက်ရည်တွေ ရောနှောနေလို့ပါ…။
အဲဒါကြောင့်ပဲ အားလုံး ပြန်ပို့လိုက်ပါတယ် ဒါပေမယ့် အတိတ် တွေဖြစ်သွားလို့ ဘယ်သူမှ
လက်မခံတော့ပါဘူး ။ သူများတွေအတွက်တော့ အိမ်မက် ဆိုတာ မျှော်လင့်ချက်လို့ ခဏခဏ ကြားဘူးလို့
morpheu နဲ့ အင်တာဗျူးတစ်ခု လုပ်ဖို့ကြိုးစားရင်း မနက်မိုးလင်းသွားပါတယ်…အိမ်မက်ဆိုတာ
ဖြစ်ပြီးသွားတာတွေ ဆိုတာ ပိုမှန်မယ်ထင်ပါတယ် ။ ပြောင်းလဲ မှုရေခဲသေတ္တာထဲမှာ မတည်မြဲချင်းတွေက
အေးခဲ တည်မြဲနေကြပြန်တယ်…။ သံချေးတက်ယဉ်ကျေးမှု တွေအတွက် ကျွန်တော် ခဏခဏ ပြုံးပြခဲ့ပါတယ်
ဒါပေမယ့် ပြုံးပြုံးလေး အိပ်ပျော်ဖို့ ကျွန်တော့ ကုတင်က
အရမ်းကျဉ်းလွန်းနေတယ် ….။ မနေ့က ဘစ် ကားစီးတုံးက နေရာရလို့ ကျွန်တော်
အိမ်ပြန်ခဲ့ပါတယ်
ဒါပေမယ့် အိမ်ရောက်မှ ထိုင်ခုံတွေ အခိုးခံလိုက်ရတယ်…။ ဒါပေမယ့်လည်း ကျွန်တော့မှာ ချစ်သူဆိုတဲ့
မူလီလေး တစ်ခုတော့ ကျန်သေးပါတယ်…။ ဘယ်နေ့မှ အဆုံးသတ်မယ်မှန်းမသိတဲ့ လမ်းထိပ်က လမ်းပြင်ရန်
အလှူခံ တစ်ခု နေ့စဉ်တွေ့ရတဲ့ ကားစပယ်ရာ ရပ်ကွက်ထဲက အတင်းပြောတဲ့ မိန်းမများ ကျွန်တော့
အခန်းထဲမှ ရေဒီယိုတစ်လုံး ညနက်သန်းခေါင်ထဟောင်တတ်တဲ့ ခွေးတစ်ကောင် အချိန်လွဲပြီး မြည်တတ်တဲ့
တိုင်ကပ်နာရီကြီး ပြီးတော့ ကျွန်တော့ချစ်သူ သူတို့တွေက တစ်ဖွဲတည်း
ဖြစ်လောက်ပါတယ်…။ ဒီလိုပါပဲ လမ်းလျှောက်တုံး ခလုပ်တိုက်မိလို့ ဖိနပ်ကို
အပြစ်တင်လို့မှ မရတာ … ။ ယုန်လေးက နားရွက်ထောင် ပညာရှိယောင်ဆောင် ဆိုတဲ့ ကဗျာလေးကို
ငယ်ငယ်က ဖတ်ဖူးပါတယ် ပညာရှိဖြစ်ဖို့ ယုန်လို နားရွက် ရှည်ဖို့လိုလား ယုန်တစ်ကောင်လို
ကြောက်ရွံတတ်ဖို့လိုလား ယုန်တစ်ကောင်လို့ သစ်ရွက်တွေစားဖို့လိုလား ဒါမှ မဟုတ် ယုန်တစ်ကောင်လို
အပြေးသန်ဖို့လိုလားဆိုတာတော့ တစ်ခါမှ မတွေးမိပါဘူး… အဲဒါကြောင့်လည်း ကျွန်တော် ပညာရှိမဖြစ်ခဲ့ပါဘူး…ကျွန်တော်ကိုယ်တိုင်ကို
အယောင်မဆောင်ချင်လို့တော့ မဟုတ်ခဲ့ပါဘူး အယောင်မဆောင်ဖြစ်တာပါ… ကျွန်တော့ အရေခွံ နဲနဲထူလိုဖြစ်မယ်ထင်ပါတယ်…။
သူငယ်ချင်းက ပြောသွားသေးပါတယ် ပင်လယ်ရေ တစ်ယောက်တည်း သောက်လို့ မကုန်ပါဘူးတဲ့ ဒါပေမယ့် ပင်လယ်ဘယ်နားမှာ ရှိမှန်း သူမသိပါဘူး…
ကျွန်တော်ကိုယ်တိုင်လည်း ကြိုးစားပြီး တက်လိုက်တာ ကိုယ်တိုင်ထိပ်ဆုံးရောက်ပြီထင်ပေမယ့်
ကျွန်တော်က ပြောင်းပြန်တက်မိလို့ ခြိုင့်ထဲ ရောက်နေမှန်းသတိမထား ခဲ့မိဘူး…။ အဲလိုပါပဲ
မနေ့က ကျွန်တော် ဖိနပ်တစ်ရံ ပျက်သွားတယ် နောက်တစ်နေ့ တစ်ရံထပ်ဝယ်လိုက်တယ် ဒါပေမယ့်ဖိနပ်ပေါက်တဲ့ဒဏ်ကို
မခံနိုင်လို့ပဲ ခြေဗြောင်နဲ့ပဲ လျှောက်သွားလိုက်တယ်…..။ ဒီလိုနဲ့ပဲ တစ်နေ၀င်တာပါ ဒီလိုနဲ့ပဲ
တစ်နေထွက်တာပါ….။ ဒီလိုနဲ့ပဲ ဟောင်းနွမ်းသွားပါတယ်…။ ဒီလိုနဲ့ပဲ ကျွန်တော် အကုန်လုံးကို
ပြန်ဖုံးထားလိုက်ပါတယ် ဘာလို့လဲ ဆိုတော့ ကျွန်တော့မှာ ဖွင့်ကြည့်ဖို့ စိတ်ကူးမရှိလို့ပါ…။

No comments: