{အသက်မွေးဝမ်းကျောင်း မဟုတ်ခဲ့ပေမယ့် ခံစားချက်တွေနဲ့ပြည့်နှက်နေတဲ့ အနုပညာမြစ်တစ်စင်းကတော့ ကျွန်တော့်နှလုံးသားအတွက် အဓိက ရေသောက်ဖြစ် တစ်ဆင်းပါပဲ}

Sunday, 23 January 2011

ကဲ ကျွန်တော်တို့ ဘာတွေချန်ထားခဲ့ကြမှာလဲ

Views

လူတိုင်းပါးစပ်ဖျားမှာလွယ်လွယ်ပြောတတ်ကြတဲ့ရှေးရိုးစဉ်လာ စကားတချို့ကို သဘောမကျ နိုင်ကြောင်းမကြာခဏဆိုသလိုရေးဖြစ်ခဲ့တယ်။ဘုရားတောင် အမှီရှိမှပွင့်တယ်ဆိုတဲ့ စကား မျိုးဟာ အတ္တာဟိ အတ္တနောနတ္ထော မိမိကိုယ်သာ ကိုးကွယ်ရာဆိုတဲ့ မြတ်စွာဘုရားသခင်ရဲ့ အဆုံးအမနဲ့ ဆန့်ကျင်နေရုံမျှမက ဘုရားသခင်ရဲ့ သဗ္ဗညုတ ရွှေဉာဏ်တော်ကိုပါ သေးသိမ် အောင်ပြုသလို ဖြစ်နေကြောင်း ရေးခဲ့ဖူးတယ်

သီလကြောင်တွေက ခုတုံးလုပ်

အလားတူပဲ 'အူမတောင့်မှ သီလစောင့်နိုင်တယ်'ဆိုတဲ့ စကားကို အကျင့်ပျက် သီလကြောင် တွေက ခုတုံးလုပ်ပြီး ထင်ရာစိုင်းတတ်တဲ့ အကြောင်းလည်း ရေးဖူးတယ်။ မကြာခင်လေး က တောင် 'ရေကိုသားလို့ အကြားမထင်' ဆိုတဲ့ တစ်သွေးတည်း တစ်သားတည်း စည်းလုံးညီ ညွတ်ရေး အညွှန်းစကားဟာ လူအမျိုးမျိုး စိတ်အထွေထွေ လောကမှာ မဖြစ်နိုင်ရုံသာမက ဒီမို ကရေစီရဲ့ သဘောနဲ့လည်း ဖီလာဆန့်ကျင် ဖြစ်နေတဲ့အကြောင်း ရေးဖြစ်လိုက်သေးတယ်။


 

စကားနောက်တရားပါ

အစိုးရဆိုတာ မိဘသဖွယ် တိုင်းသူပြည်သားများကို ရင်ဝယ်သားကဲ့သို့ စောင့်ရှောက်ရမယ်ဆိုတဲ့ စကားဟာ ပဒေသရာဇ် မင်းရှင်ဘုရင်များ အုပ်ချုပ်တဲ့ ခေတ်နဲ့ လိုက်လျောညီထွေ ဖြစ်ပေမယ့် အစိုးရကို ပြည်သူလူထုက ရွေးကောက်တင်မြှောက်တဲ့ ဒီမိုကရေစီခေတ်မှာ မဲဆန္ဒရှင် ပြည်သူ လူထုကသာ အကြွင်းမဲ့ အာဏာပိုင်စိုးသူ အကြီးအမှူး နာယက မိဘနေရာက ထားရမှာ ဖြစ်ပြီး အစိုးရနဲ့ အစိုးရ၀န်ထမ်းများက (Public Servant) ပြည်သူ့အစေခံများသာ ဖြစ်ကြောင်းကို လည်း 'အစိုးရက မိဘလား၊ ပြည်သူက မိဘလား' ဆိုတဲ့ ခေါင်းစဉ်နဲ့ ၁၁-၁၁-၂၀၁၀ နေ့ထုတ် ပြည်သူ့ခေတ်ဂျာနယ်မှာ ရေးခဲ့တယ်။ တချို့စကားတွေက 'ပညတ်သွားရာ ဓာတ်သက်ပါ' ဆိုသလို ဖြစ်နေတတ်တယ်။ တချို့ကျတော့ စကားလုံးကြောင့် ၀န်ထုပ်ဝန်ပိုးကြီးတစ်ခု ထမ်း ထားရသလို လေးလံဖိစီးနေလေ့ ရှိတယ်။ အထက်မှာ ပြောခဲ့တဲ့ 'ရေကိုသားလို့ အကြား မထင်'တဲ့ ညီညွတ်ရေးဆိုတဲ့ စကားမျိုးဆိုပါတော့ တစ်သွေးတစ်သားတည်း ပေါင်းစည်း ညီ ညွတ်ရေးဆိုတဲ့ စကားလုံးကြီး ခေါင်းစဉ်ထဲမှာ အမြစ် တွယ်နေလေတော့ သဘောထားမတူ ကွဲပြားခြားနားတာကို နည်းနည်းလေးမှ သည်းမခံနိုင်တော့ဘဲ မတူတာမှန်သမျှ ရန်ဘက် ပဋိ ပက္ခလို့ မှတ်ယူလိုက်တော့တယ်။ ရှေးစကားတွေ၊ စကားပုံတွေဆိုတာ ရှေးခေတ်က ပညာရှိကြီး တွေ ပြောခဲ့ကြ ရေးခဲ့ကြတာတွေပါ။ ကာလကြာညောင်းတော့ နောက်လူတွေက စကားပုံတွေလို့ သတ်မှတ်လိုက်ကြတာ ဖြစ်တယ်။ ရှေးလူကြီးတွေ သူ့ခေတ်သူ့အခါမှာ သူတို့ တာဝန်ကျေခဲ့ ကြသလို အခုနှစ်ဆယ့်တစ်ရာစု လူသားတွေလည်း နောင်လာနောက်သားတွေ အတွက် ဆိုရိုး စကားတွေ၊ စကားပုံတွေ ချန်ထားရစ်ကြရမှာ မဟုတ်ဘူးလား . . .


 

ပညတ်နောက်ဓာတ်လိုက်

လူတစ်ကိုယ် စိတ်တစ်မျိုးဆိုတာ သဘာဝတရားက ဖန်တီးပေးလိုက်တာပဲ။ မိဘနဲ့ သားသမီး တောင်မှ စိတ်ဓာတ်တစ်ထပ်တည်းကျတယ်လို့ ရှိမှမရှိတာ။ ဒါကို လူတိုင်းသိနေကြတယ်။ သိပေ မယ့် တစ်သွေးတစ်သားတည်း ရေကိုသားလို့ အကြားမထင်သလို ပေါင်းစည်းညီညွတ်ရမယ် ဆိုတဲ့ ပညတ်နောက်ကို ဓာတ်ကလိုက်သွားတဲ့ သဘောကြောင့် မတူကွဲပြား ခြားနားမှုကို လက် မခံနိုင်အောင် ဖြစ်နေကြတယ်။ သည်းမခံနိုင်ရာက တစ်ဆင့်တက်တော့ 'ငါနဲ့မတူ ငါ့ရန်သူ' ဖြစ် သွားကြရော။ ဒီလိုနဲ့ပဲ ကမ္ဘာကြီး တစ်ခုလုံးမှာ ပဋိပက္ခတွေ ကြီးသထက် ကြီးထွားပြီး စစ်မီးတွေ မငြိမ်းနိုင်အောင် ဖြစ်နေကြတာ။


 

မြန်မာမှန်းသိအောင်

ရှေးရိုးစဉ်လာ ဓလေ့စရိုက်တွေနဲ့ ယဉ်ကျေးမှုတွေကို ထိန်းသိမ်း စောင့်ရှောက်ရမယ် ဆိုတာ မှန် တယ်။ ဒါပေမဲ့ ရှေးရိုးစဉ်လာတွေအတိုင်း အားလုံးလိုက်လုပ်ရမယ်၊ ပြောဆိုရမယ်၊ ကျင့်သုံး ရ မယ် လို့တော့ အဓိပ္ပာယ် မကောက်သင့်ဘူး။ ပြတိုက်ထဲမှာ ထိန်းသိမ်းထားသင့်တာ တချို့ကို ထိန်းသိမ်း စောင့်ရှောက်ပြီး တချို့ကိုတော့ ကျမ်းစာအုပ်တွေထဲမှာပဲ သိမ်းထားသင့်တယ်။ နှစ် ဆယ့်တစ်ရာစုခေတ်အထိ ခေတ်မီနေသေးတဲ့ ရှေးရိုးစဉ်လာတွေ၊ ယဉ်ကျေးမှုတွေကိုတော့ မြန်မာပီသအောင်၊ မြန်မာမှန်း သိအောင် ဆက်လက်သုံးစွဲပြီး ရှင်သန်နေအောင် လုပ်ကြရမယ်။ ဒါမှ ကမ္ဘာ့အလယ်မှာ မြန်မာဆိုပြီး တင့်တယ် ၀င့်ကြွားနိုင်မှာ ဖြစ်တယ်။


 

ဆင်ခြေမပေးနဲ့

နှစ်ဆယ့်တစ်ရာစုကို အမီလိုက်ဖို့ဆိုပြီး တိုးတက်တဲ့ သူများနိုင်ငံတွေဆီက အရာမှန်သမျှကို စကားအသုံးအနှုန်းကစ ယူသုံးနေလို့ မဖြစ်ပါဘူး။ နောက်ဆုံးပေါ် ခေတ်မီနည်းပညာတွေနဲ့ ပတ် သက်တဲ့ စကားလုံး ဝေါဟာရတွေကို ဘာသာပြန်လို့ မရဘူး ဆိုတဲ့ ဆင်ခြေမျိုးပေးပြီး ဆင် ဝှေ့ရန်ရှောင် လုပ်ဖို့ မစဉ်းစားပါနဲ့။ ဒီ ဆင်ခြေမျိုးတွေနဲ့ ပတ်သက်ပြီး လွန်ခဲ့တဲ့ နှစ်ပေါင်း များ စွာ ကတည်းက ဆရာကြီး ဦးဖေမောင်တင်က ပြောခဲ့ပြီးသားပါ။ အင်မတန် ခက်ခဲနက်နဲလှတဲ့ ဗုဒ္ဓမြတ်စွာဘုရားရဲ့ တရားတော်တွေကိုတောင် မြန်မာလို ဘာသာပြန်နိုင်ပါလျက်နဲ့ လောကီ ပညာရပ်တွေကို ဘာသာပြန်လို့ မရဘူးဆိုတာ မရှိပါဘူးလို့ ဆရာကြီးက ပြောခဲ့ပါတယ်။


 

ဘာချန်ထားခဲ့မှာလဲ

ကျွန်တော်တို့ အပျင်းထူပြီး ကြိုးစားအားထုတ်မှု မပြုကြလို့သာ ဘာသာမပြန်နိုင်တာပါ။ ရှေး စကားတွေ၊ စကားပုံတွေဆိုတာ ရှေးခေတ်က ပညာရှိကြီးတွေ ပြောခဲ့ကြ ရေးခဲ့ကြတာ တွေပါ။ ကာလကြာညောင်းတော့ နောက်လူတွေက စကားပုံတွေ လို့ သတ်မှတ်လိုက်ကြတာ ဖြစ်တယ်။ ရှေးလူကြီးတွေ သူ့ခေတ်သူ့အခါမှာ သူတို့ တာဝန်ကျေခဲ့ကြသလို အခု နှစ်ဆယ့်တစ်ရာစု လူသားတွေလည်း နောင်လာနောက်သားတွေအတွက် ဆိုရိုးစကားတွေ၊ စကားပုံတွေ ချန်ထား ရစ်ကြရမှာ မဟုတ်ဘူးလား။ ကဲကျွန်တော်တို့ ဘာတွေ ချန်ထားခဲ့ကြမှာလဲ။


 

လူထုစိန်ဝင်း

No comments: